Háskólanum í Teheran rústað - myndir á Facebook

Myndir voru birtar á samskiptasíðunni Facebook í dag sem sagðar eru sýna eyðileggingu í Háskólanum í Teheran. Varalið hliðhollt Íransforseta er sagt hafa ráðist þar með ofbeldi gegn stjórnarandstæðingum. Úrslitum forsetakosninganna í síðustu viku var áfram mótmælt í írönsku höfuðborginni í dag.

Þessar myndir af mótmælunum voru sýndar á írönsku sjónvarpsstöðinni Press TV í dag. Mir Hossein Mousavi, sem kært hefur úrslit þingkosninganna og sigur Ahmdadinejads Íransforseta, er sagður á miðri myndinni þó það sé illgreinanlegt.

Vestrænum fréttamiðlum hefur verið bannað að mynda mótmæli í Íran og fjalla um þau. Lokað hefur verið fyrir vefsíður og farsímakerfi til að hindra upplýsingaflæði.

Þrátt fyrir slíkar hömlur voru þessar myndir birtar á fésbókinni í dag. Þær eru sagðar sýna eyðileggingu í Háskólanum í Teheran. AP fréttastofan ræddi við nemann sem tók myndirnar en hann vill ekki láta nafn síns geti. Hann segir að þar hafi verið að verki stuðningsmenn forsetans sem myndað hafi varalið til að berjast gegn stjórnarandstæðingum.

Þeir hafi ráðist inn í skólann á þriðjudaginn, brotið allt og bramlað og ógnað nemendum.

Byltingarráð landsins tilkynnti í dag að kærur vegna kosninganna væru nærri sjö hundruð og byrjað yrði að ræða við Mousaví og hin forstaframbjóðendurna tvo um næstu helgi og kanna sannleiksgildi ásakana þeirra.