Landhelgisgæsla sjóræningja

Sjóránum fjölgaði mjög á síðasta ári. Samtals var ráðist á 293 skip á árinu, en af þeim var 49 skipum rænt og nærri 900 skipverjum haldið í gíslingu víðs vegar um heim.

Sómalskir sjóræningjar voru afkastamestir, því þeir stóðu að 111 árásanna. Flestar árásir þeirra voru gerðar á Adenflóa á tímabilinu frá september til nóvember. Ástandið hefur ekki verið verra síðan byrjað var að taka saman tölur um sjórán í heiminum árið 1991.

Sómölsku sjóræningjarnir stunda glæpi sína í skjóli stjórnleysis, sem ríkt hefur í Sómalíu í nærri tvo áratugi. Margir þeirra líta þó á sig sem eins konar landhelgisgæslu fyrir Sómalíu.

Óprúttnir skipaeigendur og skipstjórar hafa nefnilega að einhverju marki stundað það, einnig í skjóli stjórnleysisins í Sómalíu, að veiða ólöglega í landhelgi og losa sig við eitraðan úrgang úti af ströndum Sómalíu.

Jafnvel eru dæmi um að kjarnorkuúrgangi hafi verið sturtað í hafið við Sómalíu. Þegar flóðbylgjan mikla reið yfir í desember 2004 rak eitthvað af þessum kjarnorkuúrgangi upp á strendur landsins með skelfilegum afleiðingum fyrir heilsufar íbúanna.- gb