Bresk sveitarfélög fá gálgafrest vegna Icesave

Breska ríkisstjórnin greip í taumana í dag til að hindra að sveitastjórnir skæru niður margvíslega þjónustu og hækkuðu gjöld til að mæta tapi sem þær urðu fyrir á Icesave reikningum sínum.

Reuters fréttastofan skýrir frá þessu í dag. Tap sveitarfélaganna nemur samanlagt yfir níuhundruð milljónum sterlingspunda. Það eru um 150 milljarðar króna.

Þegar íslenska bankakerfið hrundi greip breska ríkisstjórnin þegar til ráðstafana til þess að tryggja að ekkert sveitarfélag lenti í bráðum skammtíma lausafjárvanda.

Það var gert með nýjum reglum sem kveða á um að sveitarfélögin þurfi ekki strax að reikna tapið inn í fjárhagsáætlanir sínar.

Þau hafa frest til 2010-2011. Það er því litið svo á að þessir peningar séu í hættu, en ekki að þeir séu endanlega tapaðir.