Mótmælendur á þaki breska þingsins

Að minnsta kosti 30 umhverfisverndarsinnum á vegum Greenpeace-samtakanna tókst að komast upp á þak breska þinghússins í London í nótt. Hengdu þeir gríðarstóran borða utan á bygginguna þar sem lesa mátti skilaboðin: „Breytið stjórnarfarinu, bjargið loftslaginu." Talsmaður Greenpeace sagði í samtali við Telegraph að nú væri tímabært að hækka hitastig mótmælanna þar sem tíminn væri orðinn naumur og vísaði þar til hlýnunar loftslags á jörðinni en eitt af því sem umhverfisverndarsinnar mótmæla er losun gróðurhúsalofttegunda sem meðal annars er talin hafa í för með sér hækkandi hitastig á jörðinni.