Hvað er eldsneytisfærslufræðingur?

Nýstárlegum heitum yfir gamalgróin störf er ætlað að laða fólk í atvinnuleit að þeim, eftir því sem markaðsrannsóknarfyrirtækið OnePoll hefur fundið út.

Menntastofnunarnærringarráðgjafi og framlínuviðskiptastuðningsfulltrúi. Hvaða fólk er þetta eiginlega? Jú, sá fyrri er starfsmaður í skólamötuneyti en hinn símadama. Þessir uppskrúfuðu starfstitlar og margir fleiri eru að mati breska markaðsrannsóknarfyrirtækisins OnePoll ekkert nema brella vinnuveitenda til að laða almenning að störfum sem á tíðum hefur reynst erfitt að manna, jafnvel þegar atvinnuleysi herjar sem aldrei fyrr á almúgann.

OnePoll lagðist í fjögurra mánaða rannsóknarvinnu við að safna saman starfstitlum frá fólki á vinnumarkaði, greina merkingu þeirra og kanna hvert starfssvið viðkomandi væri. Það var þá sem þeir uppgötvuðu meðal annars að fjölmiðladreifingarfulltrúi ber út blöð og fæðuhreinlætistæknir annast uppvaskið á næsta veitingahúsi.

Talsmaður OnePoll segir að uppfinningasemin sé að keyra úr hófi fram þessa dagana. Sumir titlanna hafi verið á sveimi í nokkur ár en nýir streymi nú fram sem aldrei fyrr og spyrja megi hvort viðkomandi starfsmaður sé eitthvað ánægðari í vinnunni. Er þjóðvegaumhverfisfræðingur sáttari en götusópari þótt þar fari einn og sami maðurinn? Verðugt umhugsunarefni yfir páskana.