Þíða í samskiptum Rússa og Bandaríkjamanna

Útlit er fyrir þíðu í samskiptum Bandaríkjamanna og Rússa eftir forsetaskipti vestanhafs. Rússar eru sagðir ætla að fresta flugskeytavörnum sínum þar sem ný Bandaríkjastjórn hafi uppi breytta stefnu í eldflaugavörnum í Austur-Evrópu.

Interfax fréttastofan rússneska hefur í morgun eftir ónafngreindum heimildarmanni í rússneska hernum að Rússar hafi ákveðið að fresta því að koma fyrir eldflaugum í Kaliningrad. Það ætluðu þeir að gera vegna áforma Bandaríkjamanna um að koma upp eldflaugavarnarkerfi í Póllandi og Tékklandi. Rússnesk stjórnvöld hafa ekki staðfest þetta en sérfróðir segja ráðamenn í Kreml oft nota Interfax til að velta fram hugmyndum og sjá hvernig tekið verði í þær. Stjórnmálaskýrendur segja Rússa þarna að rétta fram sátthönd til Baracks Obama nýs Bandaríkjaforseta en hann og Dímítrí Medvedev, Rússlandsforseti, ræddust við í síma í fyrradag.

Rússar hafa litið á eldflaugavarnarkerfið sem beina ógn við sig þó stjórn George Bush fyrrverandi forseta hafi sagt að það yrði sett upp til að verjast ógn frá útlagaríkjum á borð við Íran.

Forsetarnir voru sammála um að það yrði að bæta samskipti ríkjanna.

Interfax hefur eftir heimildarmanni sínum að í samtali forsetanna hafi komið fram að ný Bandaríkjastjórn ætlaði að fara sér hægt hvað varðaði að hrinda áformum um eldflaugavarnarkerfið í gang. Þess vegna ætli Rússar sé að fresta því að flytja eldflaugar til Kaliningrad.

Medvedev og Obama hittast fyrst formlega á fundi þegar þeir sækja báðir fund tuttugu ríkja og alþjóðastofnana í Lundúnum í byrjun apríl. Þá verða samskipti ríkjanna rædd nánar.