Bretum verr við samkynhneigða en fólk af öðrum kynþáttum

Hópur sálfræðinga frá Shire Professional-ráðgjafarstofunni, undir stjórn dr. Pete Jones, hefur reiknað það út að meira en þriðjungi Breta sé illa við samkynhneigða en það er stærri hópur en sá sem leggur fæð á fólk af ólíkum kynþáttum en þar er um að ræða einn fjórða.

Enn fremur leiddi rannsókn sálfræðinganna í ljós að það eru Suður-Asíubúar sem minnstrar hylli njóta hjá þeim sem draga fólk í dilka eftir kynþætti. Hvernig draga rannsakendur nú fram viðhorf á borð við þessi? Sextíu manna úrtak var beðið að tengja jákvæð orð við myndir af fólki sem tilheyrir ákveðnum hópum þjóðfélagsins. Rannsakendur mældu svo hve langan tíma þetta tók og hve erfitt eða auðvelt fólkinu reyndist að finna jákvæð orð.

Með þessu vill Jones meina að hægt sé að draga fram þau viðhorf sem stjórni því hvernig viðkomandi bregðist við í lífinu. Lokatölur þess hluta sem beindist að samkynhneigð sýndu að sjö prósentum væri verulega illa við samkynhneigða, 35 prósent hefðu undirliggjandi fordóma gagnvart hommum og 41 prósent gagnvart lesbíum.