Bæjarstjóralaust í Grindavík - skipta með sér verkum

Bæjarstjóralaust verður í Grindavík eftir að Jóna Kristín Þorvaldsdóttir lætur af starfi bæjarstjóra um mánaðamótin ef hugmyndir bæjarfulltrúa Framsóknarflokksins ná fram að ganga. Oddvitar meirihlutans og fjármálastjórinn bæjarfélagsins munu skipta með sér verkum.

Petrína Baldursdóttir, oddviti framsóknarmanna og formaður bæjarráðs, segir meirihlutann ekki hafa gengið frá samkomulagi um hvernig stjórn bæjarfélagsins verði háttað eftir að Jóna Kristín hættir. Það verði gert á allra næstu dögum.

Petrína segir að í ljósi þess hve skammt er í kosningar geri hugmyndir framsóknarmanna ráð fyrir því að í stað að ráða nýjan bæjarstjóra muni Jón Þórisson, fjármálastjóri Grindavíkur, taki að sér aukinn verkefni sem snúa að rekstri bæjarfélagsins. Auk þess muni Hörður Guðbrandsson, forseti bæjarstjórnar, og hún sem formaður bæjarráðs skipta með sér verkum sem snúa að pólitíkinni.

Mikill óróleiki hefur verið í bæjarpólitíkinni í Grindavík frá kosningunum vorið 2006. Skipt var um meirihluta sumarið 2008 og í framhaldinu tók Samfylkingarkonan Jóna Kristín, við starfi bæjarstjóra. Áður en hún settist í bæjarstjórn starfaði hún sem prestur í bæjarfélaginu. Um næstu mánaðarmót tekur Jóna Kristín við Kolfreyjuprestakalli á Austurlandi.

Við meirihlutaskiptinn í fyrra lét Ólafur Örn Ólafsson af embætti bæjarstjóra. Starfslokasamningur hans vakti talsverða athygli en samningurinn tryggði Ólafi meðal annars 1,2 milljónir króna í mánaðarlaun út kjörtímabilið auk sex mánaða eftir að því líkur í maí á næsta ári.

Meirahlutasamstarf í bæjarstjórn Grindavíkur er með Samfylkingu og Framsóknarflokki með stuðningi Vinstri grænna.