Nýr sími lítur dagsins ljós: Barackberry

Af öryggisástæðum er alls óvíst að Barack Obama fái að halda sínum ástkæra Blackberry-síma.

Obama er Blackberry-sjúklingur, það hefur hann sjálfur viðurkennt fúslega. Fyrir þá sem eru ekki á kafi í nýjustu undrum farsímatækninnar er Blackberry samheiti yfir ákveðið snið síma sem um leið er vefvafri, faxtæki, tölvupóstmóttakari og fleira. Þá býr Blackberry yfir lyklaborði með sömu uppröðun og hefðbundið tölvulyklaborð.

Obama sást ósjaldan með slíkan grip á lofti í kosningabaráttunni og er nú uggandi yfir því að öryggisdeild Hvíta hússins bannfæri símann. Lífverðirnir svartklæddu eru ekkert ánægðir með síma sem sendir tölvupóst, of einfalt þykir að brjóta sér leið inn í slík fjarskipti og njósna. George Bush sendi aldrei tölvupóst úr Hvíta húsinu og Bill Clinton aðeins tvo, þar af annan út í geiminn.

Að lokum er GPS-staðsetningartæki innbyggt í Blackberry-símann sem hægt er að nota til að staðsetja forsetann með mikilli nákvæmni. Slíkt þykir heldur ekkert vit. Nú, hvað þá? Jú, Þjóðaröryggisstofnunin hefur látið útbúa 3.500 dollara síma fyrir Obama og kallar gripinn Barackberry sem að sjálfsögðu er logandi háð. Sá er hannaður af General Dynamics sem á sínum tíma smíðaði F-16-orrustuþotur og á að heita algjörlega njósnaheldur. Og það er bannað að senda SMS í Hvíta húsinu svo það sé á hreinu.