Skókastarinn í Írak heiðraður með bronsskó

Gríðarmikill skór úr bronsi hefur verið settur upp í bænum Tikrit í Írak til heiðurs blaðamanninum Muntader al-Zaidi sem varð þjóðhetja arabaheimsins í einu vetfangi þegar hann grýtti skóm sínum í George Bush, þáverandi Bandaríkjaforseta, í desember og kallaði hann hund.

Í skóinn, sem er þriggja metra hár, hefur tré verið plantað og ljóð, sem fjallar um al-Zaidi, er ritað á skilti á skónum. Blaðamaðurinn var handtekinn eftir verknaðinn og ákærður fyrir ógnandi tilburði gagnvart erlendum þjóðhöfðingja. Við því liggur allt að 15 ára fangelsi.