Sigaði moskítóflugum á ráðstefnugesti

Bill Gates, stofnandi Microsoft, kom gestum tækniráðstefnu í opna skjöldu þegar hann hleypti tugum moskítóflugna úr búri út í salinn.

Gates var þó ekki búinn að missa vitið heldur vildi hann með tiltækinu vekja athygli á hitabeltissjúkdómnum mýrarköldu sem smitast einmitt með moskítóflugum.

Hann var að flytja ávarp á hinni árlegu tækni- og afþreyingarráðstefnu í Kaliforníu fyrr í vikunni og tengingin við mýrarköldu, sem einnig kallast malaría, var ekki alveg út í bláinn þar sem Gates var að kynna viðstöddum nýtt verkefni Bill og Melindu Gates-stofnunarinnar sem gengur út á að þróa bóluefni gegn sjúkdómnum. Tilraunir með efnið fara upp á svokallað þriðja stig eftir nokkrar vikur.

Gates opnaði búr fullt af moskítóflugum hinn rólegasti og sagði við gestina að reyndar hefði hann kippt nokkrum moskítóflugum með sér og nú skyldu gestirnir leyfa þeim að flögra um salinn. Hann beið í heila mínútu með að segja frá því að þessar moskítóflugur væru algjörlega lausar við alla sjúkdóma.

Auðvitað var um orðaleik að ræða að hluta til og sagðist Gates nú ætla að hleypa fleiri pöddum út í heiminn en enska orðið bug, sem táknar pöddu eða skordýr, er einnig haft um villur í tölvuforritum.