Rússneski flugherinn meira og minna ónýtur

Það eru um 650 orrustuþotur í rússneska flughernum. Þar af eru um 290 af gerðinni MiG 29. Þær eru taldar með bestu þotum flughersins þótt þær hafi verið hannaðar á sjöunda áratugnum.

Rússneska viðskiptablaðið Kommersant hefur eftir heimildarmönnum innan hersins og varnarmálaráðuneytisins að 200 af MiG þotunum séu ónýtar.

Þær geti ekki einusinni tekið á loft, hvað þá barist. Rússar settu flugbann á allan MiG flotann í desember síðastliðnum eftir að tvær þotur fórust með stuttu millibili.

Haft er eftir hershöfðingja í flughernum að stélin hafi hreinlega fokið af vélunum á flugi vegna tæringar. Í kjölfarið hafi allar vélar af þessari gerð verið grandskoðaðar og komið í ljós að 200 þeirra væru hreinlega ónýtar.

Sprengjuflugvélar Rússa eru einnig flestar eldgamlar og úr sér gengnar.

Þetta er mikill álitshnekkir fyrir herveldið Rússland sem hefur verið að skekja spjót sín á nýjan leik undanfarin misseri.

Þetta bætist ofaná að stærsta og öflugasta herskip Rússlands, flugmóðurskipið Pétur mikli fer ekki á sjó án þess að hafa með sér dráttarbáta, vegna tíðra bilana.

Og þótt Rússar ynnu einhverskonar sigur í hinu stutta stríði í Georgíu þá var það eingöngu vegna þess að þeir tefldu fram ofurefli liðs.

Stríðið leiddi nefnilega í ljós að ýmislegt er að hjá landhernum, bæði hvað snertir búnað og þjálfun.