Obama krefst þess að Aung San verði leyst úr haldi

Barack Obama, Bandaríkjaforseti, krefst þess að nóbelsverðlaunahafanum og stjórnandstöðuleiðtoganum Aung San Suu Kyi verði án tafar og skilyrðislaust leyst úr haldi. Þetta kemur fram í tilkynningu frá forsetanum.

Herforingjastjórnin í Burma er að reyna að fá Aung San Suu Kyi dæmda í fimm ára fangelsi til viðbótar við stofufangelsi sem hún hefur verið í vegna þess að bandarískum manni tókst að henni forspurðri að komast inn á heimili hennar.



Aung San hefur verið í stofufangelsi meira og minna síðan flokkur hennar vann stórsigur í kosningum í Burma fyrir 19 árum. Herforingjastjórnin ógilti þær kosningar.