Enn er óvissa með Tevez

Kia Joorabchian umboðsmaður framherjans Carlos Tevez hjá Manchester United útilokar ekki að leikmaðurinn fari frá félaginu ef samningar nást ekki á næstu vikum.

Framtíð Argentínumannsins á Old Trafford hefur verið mikið í umræðunni að undanförnu og hann hefur m.a. verið orðaður við Real Madrid. Tveggja ára lánssamningur hans við United er brátt á enda runninn og ekki hefur gengið að ganga frá endanlegum kaupum enn sem komið er.

"Tevez er leikmaður United og verður það væntanlega áfram. Hann hefur sagt að hann vilji vinna fleiri titla með liðinu. Hann vill klára þá sex mánuði sem hann á eftir af samningi sínum og er ánægður. Ef hann fær nýjan samning og allt gengur eftir er það auðvitað fínt, en ef ekki, semur hann bara við annað félag," sagði Joorabchian.