Fréttir bárust af 70.000 uppsögnum í gær

Meira en 50 þúsund Bretar hafa nú misst vinnuna eða eru á uppsagnarfresti frá áramótum. Nýjustu uppsagnarbréfin koma frá stálfélaginu Corus, áður British Steel, og raftækjaframleiðandanum Philips.

Fyrrnefnda fyrirtækið hyggst fækka um 2.500 starfsmenn á næstunni og segja greiningarsérfræðingar vinnumarkaðarins að tala atvinnulausra í Bretlandi nái að líkindum 2,8 milljónum á þessu ári og 3,4 á því næsta, gangi spár eftir.

Staðan er litlu skárri í Bandaríkjunum þar sem vinnuvélaframleiðandinn Caterpillar boðar 20.000 uppsagnir. Í heildina bárust fréttir um 70.000 uppsagnir í gær.