Danska tollgæslan kvartar yfir skorti á eftirliti

Danska tollgæslan hefur þungar áhyggjur af slælegu eftirliti með vopnum, lyfjum og peningum við landamæri. Niðurskurður og skortur á úrræðum er orsök þess vanda að sögn Jørn Rise, formanns Tollvarðafélags Danmerkur.

Rise segir að jafnvel þótt sú staða komi upp að ferðamaður sé stöðvaður af tollvörðum með reiðufé yfir leyfilegum mörkum (ef um hærri upphæð en 10.000 evrur er að ræða ber að tilkynna tollvörðum um það) sé staðan gjarnan sú að ekki reynist nægilegur mannskapur á staðnum til að telja peningana og leggja hald á þá, á þann hátt sem reglur bjóði.