Herða eftirlit með flugfélögum í kreppunni

Danska flugmálastjórnin ætlar að herða eftirlit með flugfélögum af ótta við að slakað verði á öryggiskröfum til þess að bregðast við verri rekstraraðstæðum sem framundan eru.

„Þegar niðursveifla er í samfélaginu eykst krafan um að stjórnvöld séu á tánum. Við erum á varðbergi og skoðum nokkra hluti til viðbótar við þá sem við myndum annars skoða," segir Thorbjørn Ancker, upplýsingafulltrúi dönsku flugmálastjórnarinnar, í samtali við vef danska blaðsins Politiken.

Ancker segir að flugfélögin hafi betra viðhald á flugvélum en stjórnvöld krefjist þegar það er uppsveifla í hagkerfinu. En viðhaldið minnki þegar að peninga vanti í kassann.

Árið 2007 gerði danska flugmálastjórnin 1856 athugasemdir í 541 viðhaldsskoðun á flugvélunum. Tölur fyrir síðasta ár eru ekki á takteinunum, hvorki um fjölda skoðana né fjölda athugasemda.