J.D. Salinger stefnir rithöfundi fyrir brot á höfundarrétti

Höfundur skáldsögunnar Bjargvætturinn í grasinu hefur stefnt öðrum rithöfundi og útgáfufyrirtæki hans vegna bókar sem sá síðarnefndi skrifaði sem framhald sögunnar.

„The Catcher in the Rye" eftir Jerome David Salinger, sem alla jafna er auðkenndur sem J.D. Salinger, er saga sem allmargir Íslendingar lásu og lesa enn fyrir enskutíma sína í framhaldsskólum landsins. Þarna er um að ræða eitt af tímamótaverkum bandarískrar skáldsagnagerðar á 20. öldinni en sagan af Holden Caulfield, brottrekstri hans úr skóla og ærlegu skemmtanalífi í nokkra daga þar á eftir var umdeild og um tíma bönnuð í Bandaríkjunum.

Flosi Ólafsson þýddi Bjargvættinn síðar yfir á íslensku og þótti byltingarkennt slangur og sérstakt orðfæri aðalsöguhetjunnar skila sér ágætlega í þeirri þýðingu. Nú hefur Salinger stefnt rithöfundi sem kallar sig J.D. California og hefur, án þess að spyrja kóng eða prest, sent frá sér framhald sögunnar sem hann kallar „Gegnum grasið - 60 árum síðar" eða „60 Years Later: Coming Through the Rye".

Upprunalega skáldsagan kom út árið 1951 og á Salinger að sjálfsögðu höfundarréttinn að henni. Í stefnunni segir Salinger yngri höfundinn nota hugverk hans í ábatasömum tilgangi að honum fornspurðum og yfirleitt í algjöru heimildarleysi. Þetta sé hreint og klárt brot á hugverka- og auðkennarétti og fer Salinger fram á lögbann gegn útgáfunni sem fyrirhuguð er í haust.