Brak úr frönsku flugvélinni fundið

Brak úr farþegaþotu Air France, sem hvarf með 228 manns innanborðs yfir Atlantshafinu í fyrrinótt, fannst í dag um 640 kílómetra norðaustur af Brasilíu. Flugvélasæti er sagt meðal þess sem flýtur um í sjónum en það voru hermenn úr brasilíska sjóhernum sem fundu brakið.

Vélin fórst á leið sinni frá Rio de Janeiro í Brasilíu til Charles de Gaulle-flugvallarins í París. Vélin flaug inn í ókyrrðarsvæði áður en samband við hana rofnaði en klukkan 4:15 að frönskum tíma bárust flugstjórnarmönnum í París sjálfvirk skilaboð frá viðhaldstölvum þotunnar þar sem greint var frá því að einhver af kerfum hennar væru í ólagi og virkuðu ekki sem skyldi.

Íslendingurinn sem var um borð í farþegaflugvélinni sem saknað er heitir Helge Gustafsson. Hann bjó lengst af í Noregi en flutti til Brasilíu fyrir fimm árum síðan.

Þetta mun vera mannskæðasta flugslys Air France frá upphafi.