Neita að gefa út bók um óstjórn Bretlands

Tveir breskir útgefendur hafa neitað að gefa út bók sem fjallar á gagnrýninn hátt um stöðu Bretlands og fer ofan í saumana á því hvernig landinu hefur verið stjórnað.

Eammon Butler heitir höfundurinn og hann hefur lagst í ítarlegar rannsóknir á bresku þjóðfélagi og grafið upp skuggalega tölfræði um hitt og þetta. Til dæmis hefur hann reiknað út að skuldir landsins nemi 175.000 pundum á hvert heimili og Bretland sé orðið svo mikið eftirlitsþjóðfélag að fjórðungur allra öryggismyndavéla heimsins sé staðsettur þar.

Butler fer ekki í neinar grafgötur um það hvernig hann telur forsætisráðherrana Gordon Brown og Tony Blair hafa haldið um stjórnartaumana. Ár hvert hafa bresk stjórnvöld gefið út um það bil 3.500 reglugerðir sem spanni um það bil 100.000 blaðsíður en þó virðist staðan ekki gera neitt annað en hríðversna.

Eins bendir hann á að helmingur DNA-sýna sem lögreglan hafi tekið árin 2006 og 2007 hafi verið úr börnum, þar af eitt úr sjö mánaða gamalli stúlku. Það versta er að enn hefur enginn viljað gefa bók Butlers út.