ESB vill aðstoða Rúmeníu

Evrópusambandið er reiðubúið að hefja viðræður við ráðamenn í Rúmeníu um fjárhagsaðstoð vegna efnahagserfiðleika landsins í kjölfar fjármálakreppunnar.

Joaquin Almunia sem fer með efnahagsmál í framkvæmdastjórn ESB segir að hugsanleg lánaveiting kæmi úr sérstökum sjóði sambandsins og yrði væntanlega til fimm ára.

Ungverjaland og Lettland hafa áður notið hjálparframlags úr sjóðnum en lánveitingarnar voru hluti af björgunarpökkum til þess að bjarga efnahag landanna.

Sendinefnd á vegum Alþjóðagjaldeyrissjóðsins er væntanleg til Rúmeníu á miðvikudaginn til að ræða við þarlend stjórnvöld um hugsanlega aðstoð. Traian Basescu, forseti landsins, segir að landið þurfi nauðsynlega á erlendu fjármagni að halda.