Tyrkir vilja ekki Anders Fogh í NATO

Anders Fogh Rasmussen hefur verið sterklega orðaður við embætti framkvæmdastjóra NATO.

Mörg aðildarríki vilja að búið verði að tilnefna nýjan framkvæmdastjóra fyrir leiðtogafund bandalagsins sem haldinn verður 3-4 apríl næstkomandi.

Danski forsætisráðherrann nýtur víðtæks stuðnings meðal aðildarríkjanna en ekki þó í Tyrklandi.

Tyrkir eru svo mikið á móti honum að viðbúið er að þeir muni beita neitunarvaldi.

Ástæðan er meðan annars sú að Danir hafa leyft kúrdisku sjónvarpsstöðinni ROJ að starfa í Danmörku. Hún er útlæg í Tyrklandi þar sem Tyrkir telja hana styðja hryðjuverkasamtökin PKK.

Árið 2005 þegar Tayyp Erdogan forsætisráðherra Tyrklands var í opinberri heimsókn í Danmörku héldu þeir Fogh Rasmussen sameiginlegan blaðamannafund.

Þegar Erdogan frétti af því að blaðakona frá ROJ væri á fundinum krafðist hann þess að henni yrði vísað á dyr.

Því hafnaði Rasmussen og rauk þá Tyrkinn í fússi út af fundinum.

Tyrkir eru einnig reiðir danska forsætisráðherranum vegna Múhameðsteikninganna svokölluðu.

Þrátt fyrir mikinn þrýsting neitaði Rasmussen að koma að málinu og sagði að ríkisstjórnin gæti ekki ráðskast með danska fjölmiðla.

Rétt er að taka fram að þótt Daninn hafi verið sterklega orðaður við embætti framkvæmdastjóra NATO hefur hann ekki formlega tilkynnt að hann sækist yfirleitt eftir því.