Keyptu lúxusjeppa fyrir neyðaraðstoð

Um 87 þúsund manns létu lífið í jarðskjálftanum sem varð í Sichuan héraði í Kína í maí á síðasta ári. Milljónir manna misstu heimili sín og hafa þurft að hafast við í tjöldum síðan.

Fjársöfnun var hleypt af stað um land allt og gríðarlegar upphæðir sendir til skjálftasvæðanna. Það fé hefur ekki allt skilað sér. Um það bil tvöþúsund kærur um spillingu hafa borist til yfirvalda í Peking.

Meðal annars var kærð sveitastjórn sem notaði drjúgan skilding í að kaupa flota af lúxusjeppum. Sveitastjórnin svarar því til að það hafi verið nauðsynlegt að kaupa fjórhjóladrifsbíla vegna ástands vega.

Margir bloggarar hafa skilning á því að það þurfi fjórhjóladrifsbíla, en kannski ekki allra dýrustu útgáfur af Toyota Landcruiser og Nissan X-trail með öllum aukabúnaði sem sé hægt að troða í þær.