Obama hvetur Karzai til þess að beita sér gegn spillingu

Forseti Bandaríkjanna, Barack Obama, hvetur Hamid Karzai, nýkjörinn forseta Afganistan, til þess að skrifa nýjan kafla í leiðtogahlutverki sínu í Afganistan. Obama óskaði leiðtoganum til hamingju í dag en Karzai var réttkjörinn leiðtogi Afganistan eftir að andstæðingur hans, Abdullah Abdullah, dró framboð sitt til baka og sakaði Karzai um kosningasvik.

Kosningarnar hafa verið afar umdeildar og var Karzai sakaður um að hafa rangt við í kosningunum.

Barack Obama hringdi í Karzai eftir að hann var lýstur sigurvegari kosninganna, og óskaði honum til hamingju. Obama hvatti hann einnig til þess að beita sér gegn hverskyns spillingu í Afganistan sem er eins og púðurtunna þessa daganna en Talibönum vex ásmegin daglega.

Obama lýsti kosningunum sem nokkurskonar klúðri en Karzai væri engu að síður réttkjörinn leiðtogi Afganistan samkvæmt þarlendum lögum og slíkt ætti að virða. Karzai var réttkjörinn eftir að eini andstæðingur hans dró framboð sitt til baka. Kosningarnar áttu að fara fram næstu helgi en Talibanar höfðu áður tilkynnt að þeir myndu láta til skara skríða á kosningadegi.

Þetta kom fram á fréttavef BBC.