Efnahagslægðin verður hugsanlega dýpri

Óttast er að efnahagslægðin sem nú gengur yfir heiminn verði mun dýpri en áður hefur verið spáð. Verulega hefur dregið úr eftirspurn og neyslu á síðustu mánuðum og allt bendir til þess að framundan sé tímabil verðhjöðnunar verði ekkert að gert.

Fjármálaráðherrar G7 ríkjanna, helstu iðnríkja heims, funduðu í Rómarborg um helgina. Ráðherrarnir ræddu meðal annars mögulegar aðgerðir til að fá hjól efnahagslífsins og heimsmarkaðarins til að snúast á ný.

Verulega hefur dregið úr eftirpurn á síðastliðnum mánuðum. Þrátt fyrir að fjölmörg ríki hafi beinlínis dælt peningum inn í bankakerfið hafa bankarnir dregið verulega úr útlánum.

Stýrivextir hafa verið lækkaðir til að örva efnahagslífið en hingað til hefur það ekki borið árangur. Nú er svo komið að svigrúm til frekari stýrivaxtalækkunar er ekki til staðar. Stýrivextir í Bandaríkjunum og Japan eru nánast komnir niður í núll og á Evrusvæðinu eru stýrivextir 2 prósent. Fastlega er búist við því að þeir verða lækkaðir niður í 1,5 prósent við næstu stýrivaxtaákvörðun.

Haldi eftirpurn áfram að dragast saman er ekki útilokað að við taki tímabil verðhjöðnunar. Neytendur bíða með að kaupa vörur þar sem þeir búist við því að hún muni lækka frekar.

Á fundi fjármálaráðherra G7 ríkjanna voru ræddir leiðir til að koma í veg fyrir þessa þróun. Meðal þess sem kemur til greina er hreinlega að prenta peninga og dæla þeim inn í hagkerfið. Önnur leið sem sem er talin líklegri er að bankar kaupi eignir og auki þannig flæði fjármagns.

Í yfirlýsingu sem ráðherrarnir sendu frá sér að fundi loknum í gær kemur fram að ríkin ætli sér að efla samstarf við að auka hagvöxt og berjast gegn fjármálakreppunni í heiminum.