Liðsmenn al Kaida féllu í mislukkaðri tilraun

Al Kaida hópur í Alsír þurrkaði sjálfan sig út þegar tilraun með sýklavopn fór úrskeiðis.

Bandaríska blaðið Washington Times hefur eftir heimildarmanni í leyniþjónustunni að al-Kaida liðarnir hafi verið að rækta sýkla fyrir kýlapestina Svartadauða sem felldi þriðjung íbúa Evrópu á þrettándi öld.

Sýklana átti að nota til árása í vestrænum borgum.

Leyniþjónustan hleraði í byrjun janúar símtal frá hópnum í Alsír við leiðtoga al-Kaida á landamærum Pakistans og Afganistans. Þar sögðust þeir þurfa að loka búðunum þar sem eitthvað hefði farið úrskeiðis við ræktunina og þeir væru sjálfir sýktir.

Breska blaðið Daily Telegraph hefur einnig fjallað um málið og segir að fjörutíu al-Kaida liðar hafi sýkst og látið lífið.

Leyniþjónustumaðurinn sem Washington Times talaði við kvaðst ekki geta staðfest þá tölu.

Samkvæmt bandarísku leyniþjónustunni eru tíu eða tólf al-Kaida hópar starfandi í Alsír og bera ábyrgð á mörgum hryðjuverkaárásum bæði gegn yfirvöldum og almennum borgurum.