Kim er við hestaheilsu

Kim Jong-il, leiðtogi Norður-Kóreu, er við hestaheilsu og fullfær um að stjórna landinu. Þetta fullyrðir sonur hans, Kim Jong-Nam en sögusagnir um alvarleg veikindi leiðtogans hafa verið lífseigar.

Jong-il fékk heilablóðfall í ágúst og sást ekki opinberlega vikum saman. Komst þá meðal annars sá kvittur á kreik að hann hefði farið í skurðaðgerð og látist í henni miðri. Japanska leyniþjónustan bætti um betur og hélt því fram að leiðtoginn væri löngu látinn og hópur tvífara gegndi hlutverki hans undir vökulu auga herforingjastjórnarinnar í Pyongyang.

Að minnsta kosti er ekki vitað um neinn sem hefur séð Kim Jong-il öðruvísi en úr fjarlægð lengi vel.