Voðaskotið í Rússlandi: Enn ekki búið að yfirheyra skiptinemann

Magnús Már Guðmundsson skrifar 24. júní 2009 12:55

Ekki er enn búið að yfirheyra 18 ára íslenska stúlku sem varð tvítugum pilti að bana í borginni Astrakahn í Rússlandi í október á síðasta ári.

Stúlkan dvaldi sem skiptinemi hjá fjölskyldu í borginni Astrakahn í suðvesturhluta Rússlands. 10. október 2008 hljóp voðaskot úr skammbyssu sem stúlkan hélt á og hafnaði skotið í höfði tvítugs pilts sem bjó á heimilinu. Pilturinn var fluttur á sjúkrahús þar sem hann lést af sárum sínum fjórum dögum síðar. Stúlkan kom til Íslands um miðjan október.

„Boltinn er hjá þeim," segir Guðrún Sesselja Arnardóttir, lögfræðingur stúlkunnar, og bætir við að svo virðist sem að yfirvöld í Rússlandi líti ekki á málið sem forgangsmál.

Guðrún segir að strax í haust hafi rússneskum yfirvöldum verið gert ljóst að stúlkan væri reiðubúin til að svara öllum spurningum lögreglu varðandi málið.

Tengdar fréttir

Voðaskot í Rússlandi: Beðið eftir viðbrögðum

Ekki er búið að taka skýrslu af 17 ára íslenskri stúlku sem varð tvítugum pilti að bana í borginni Astrakahn í Rússlandi í október. Guðrún Sesselja Arnardóttir, lögfræðingur stúlkunnar, segir að beðið sé eftir viðbrögðum rússneskra yfirvalda sem hefur verið gert ljóst að stúlkan sé reiðbúin að svara spurningum varðandi málið.

9. janúar 2009 12:31

Staðfest að íslensk stúlka hafi orðið Rússa að bana

Íslensk stúlka sem var skiptinemi í borginni Astrakhan í Rússlandi varð ungum manni á heimili sínu að bana með slysaskoti.

17. október 2008 12:00

Íslenskur skiptinemi sagður eftirlýstur fyrir manndráp í Rússlandi

Rússnesk stjórnvöld eru sögð hafa lýst eftir íslenskri stúlku sem var skiptinemi þar í landi vegna manndráps af gáleysi.

17. október 2008 10:40

Voðaskotið í Rússlandi: Líklega réttað yfir stúlkunni hér á landi

Rússneskir fjölmiðlar fjalla um mál íslensku stúlkunnar sem var skiptinemi í borginni Astrakhan í Rússlandi og varð ungum pilti að bana fyrr í mánuðinum. Stúlkan sem nú er stödd á Íslandi er sögð eiga yfir höfði sér allt að tveggja ára fangelsisdóm verði hún sótt til saka í landinu. Líklegra þykir þó að mál hennar verði rekið fyrir íslenskum dómstólum.

20. október 2008 13:48

Voðaskotið í Rússlandi: Íslenska stúlkan kom til Íslands í gær

„Við getum staðfest það að 17 ára íslensk stúlka sem var skiptinemi í bænum Astrakahn í Rússlandi varð fyrir því að eiga aðild að því sem samkvæmt okkar heimildum er slysaskot. Það olli því að tvítugur piltur lést af völdum skotsársins á sjúkrahúsi," segir Pétur Ásgeirsson skrifstofustjóri hjá Utanríkisráðuneytinu.

17. október 2008 13:48