Pizzarro að nálgast Werder Bremen

Framherjinn Claudio Pizzarro er hugsanlega á leiðinni aftur til Werder Bremen frá Chelsea en hann var á láni hjá þýska félaginu á síðustu leiktíð.

Klaus Allofs, yfirmaður knattspyrnumála hjá Bremen, hefur staðfest að ekki mikið beri á milli til þess að leikmaðurinn gangi í raðir félagsins en kaupverðið liggur ekki fyrir að svo stöddu.

Pizzarro er ekki í framtíðarplönum Carlo Ancelotti hjá Chelsea en Bremen hefur verið að reyna að kaupa leikmanninn í allt sumar enda sló hann í gegn og skoraði 28 mörk á lánstíma sínum hjá félaginu á síðustu leiktíð.

„Ég vonast til þess að gengið verði frá málum eins fljótt og auðið er. Við erum að gera allt sem í okkar valdi stendur til þess að fá Pizzarro," segir knattspyrnustjórinn Thomas Schaaf hjá Bremen.