Vill fylgjast vandlega með mörkuðum og leita sátta við múslima

Barack Obama varð nú síðdegis fertugasti og fjórði forseti Bandaríkjanna þegar hann sór embættiseið fyrstur blökkumanna. Obama segir á valdatíma sínum verði fylgst vandlega með mörkuðum svo þeir fari ekki aftur framúr sér. Herlið yrði kallað heim frá Írak með ábyrgum hætti og friður tryggður í Afganistan. Sátta yrði leitað við múslima um heim allan.

Fólk lagði mikið á sig til að geta verið viðstatt embættistökuna. Þeir sem ekki höfðu miða í sæti sváfu í nótt við tröppur þinghússins til að ná í sem best sæti og stæði þegar hleypt yrði inn.

Búist var við tveimur milljónum gesta og ætla má að sú hafi orðið raunin.

Fyrstur sór Joseph R. Biden yngri embættiseið sem varaforseti. Síðan var komið að Obama að sverja eið á biblíuna sem Abraham Lincoln notaði til þess sama 1861. Það gekk ekki snuðrulaust fyrir sig.

Obama sagði erfiðleikatíma ríkjandi við upphaf forsetatíðar sinnar.

Obama sagði að herlið yrði kallað heim frá Írak á ábyrgan hátt og að friður yrði tryggður í Afganistan. Gripið yrði til aðgerða til bjargar efnahag landsins og þeir sem hefðu misfarið með fé Bandaríkjamanna yrðu látnir sæta ábyrgð. Eftirlit með mörkuðum yrði eflt. Einnig yrði samband við múslima um allan heim bætt.