„Farðu til Íslands, en komdu ekki aftur"

„Bróðir mannsins míns fór um daginn í útlendingaeftirlitið til að endurnýja ferðaleyfið sitt. Hann fékk það endurnýjað en konan sem afgreiddi hann spurði hann af hverju hann færi ekki bara til Íslands eins og bróðir sinn? En hún lét það fylgja með að hann ætti ekki að koma aftur eins og bróðir sinn eða eins og hún orðaði það „ekki vera eins vitlaus og bróðir þinn að koma hingað aftur með fjölskyldu". Þetta skrifar Elsa Dóróthea Daníelsdóttir, sem býr í Beit Hanina í Jerúsalem ásamt palestínskum manni sínum og tveimur börnum, í aðsendri grein sem birtist hér á Vísi í morgun.

Elsa segir að lygarnar sem velli úr Ísraelsmönnum séu fyrir neðan allar hellur. Vopnahléið sem eigi að vera daglega í 3 tíma sé ekki til staðar, þeir haldi áfram að sprengja á meðan íbúar Gaza hætti sér út fyrir hússins dyr til að sækja sér til matar. Þeir séu matarlausir, vatnslausir, olíulausir og rafmagnslausir. „Ísraelar segjast vera að forðast það að drepa saklausa borgara, hvert er þá markmiðið með að smala saklausu fólki, þar á meðal börnum, í skólabyggingu og sprengja hana svo? Þeir eru búnir að sprengja sjúkrabíla og lækna, bæði úr lofti og á landi," segir Elsa.

Líkt og Fréttastofa greindi frá á mánudag kemst Elsa lítið út úr húsi vegna þess að hún er með útrunnið dvalarleyfi. Hún segist hvergi mega hitta lögreglumann eða hermann. Ef þeir biðji hana um dvalarleyfið og sjái að það er útrunnið, þá vísi þeir sér úr landi samstundis.