Eiga nóg í fjórar til fimm bombur

Bandarískur sérfræðingur Selig Harrison hefur verið í Norður-Kóreu síðan á þriðjudag og rætt við háttsetta embættismenn þar í landi.

Hann segir að sér hafi verið tjáð að ef Barack Obama taki um það pólitíska ákvörðun að bæta samskiptin við Norður-Kóreu geti þjóðirnar orðið vinir.

Kóreumenn séu hinsvegar ekki reiðubúnir til þess á þessu stigi að hætta við kjarnorkuvopnaáætlun sína. Þeir hafi þegar hreinsað 30,8 kíló af úrani sem dugi til þess að smíða fjórar eða fimm kjarnorkusprengjur.

Harrison sagði að hann hefði enga leið til að sannreyna þessar fullyrðingar.

Norður-Kórea hefur oft lofað að hætta kjarnorkubrölti sínu. Landið hefur hinsvegar dregið lappirnar í fimmtán ár, þrátt fyrir vestræn loforð um aðstoð við að koma landinu upp úr þeirri örbirgð sem þar ríkir.