Mikilvægir sigrar hjá Portsmouth, Stoke og Sunderland

Fallbaráttan í ensku úrvalsdeildinni harðnaði enn í dag er Portsmouth, Stoke og Sunderland unnu mikilvæga sigra. Middlesbrough tapaði hins vegar dýrmætum sigrum og er útlitið dökkt fyrir liðið.

Djibril Cisse skoraði eina mark Sunderland gegn Hull með skalla í fyrri hálfleik. Kenwyne Jones skoraði einnig fyrir Sunderland en markið var dæmt af. Daryl Murphy átti einnig skot í stöng.

Sunderland hafði tapað fjórum í röð og Hull hefur nú aðeins unnið einn af síðustu sautján leikjum liðsins.

Hull er nú aðeins þremur stigum frá fallsæti en Sunderland fór upp í fimmtánda sætið með sigrinum. Hull er í sextánda sæti með 34 stig, rétt eins og Blackburn sem tapaði fyrir Stoke í dag.

Það var Liam Lawrence sem skoraði eina mark leiksins í síðari hálfleik. Stoke er nánast öruggt með úrvalsdeildarsætið þar sem liðið er nú í ellefta sæti, átta stigum frá fallsæti.

Kanu tryggði Portsmouth þrjú dýrmæt stig í leik liðsins gegn Bolton í dag. Nadir Belhadj tók hornspyrnu og stýrði Kanu knettinum í netið. Hann var þá nýkominn inn á sem varamaður fyrir David Nugent.

Grétar Rafn Steinsson lék allan leikinn fyrir Bolton og Hermann Hreiðarsson allan leikinn fyrir Portsmouth.

Aston Villa og West Ham gerðu 1-1 jafntefli. Emile Heskey kom Aston Villa yfir snemma leiks en Diego Tristan jafnaði metin fimm mínútum fyrir leikslok.

Þá gerðu Middlesbrough og Fulham markalaust jafntefli.

Middlesbrough er því enn í fallsæti og nú með 31 stig. Bolton er í þrettánda sæti og Portsmouth í því fjórtánda - bæði með 37 stig.