Angela Merkel sendir páfa tóninn

Angela Merkel kanslari Þýskalands sagði í dag að Benedikt páfi yrði að gera alveg ljóst að Páfagarður leyfi enga afneitun á helför gyðinga í síðari heimsstyrjöldinni.

Mikið upphlaup hefur verið vegna þeirrar ákvörðunar páfa að aflétta bannfæringu af fjórum kaþólskum biskupum. Einn þeirra hefur dregið í efa að gasklefar hafi verið til og að jafn margir gyðingar hafi verið myrtir í stríðinu og sagan segir.

Merkel var óvenju hvassyrt í umsögn sinni. Hún sagði að hún skipti sér ekki venjulega af innri málum kirkjunnar, en þarna væri verið að fjalla um grundvallar spurningar.

Páfagarður yrði að gera alveg ljóst að hann líði ekki að helförin sé dregin í efa. Það hafi ekki verið gert ennþá.