Frítt að æfa á nýja golfvellinum

tómstundir „Ég veit hreinlega ekki hvort þetta er eini staðurinn á landinu þar sem hægt er að komast ókeypis í golf, en mér þykir það líklegt,“ segir Halldór Rafnsson, formaður Golfklúbbs Akureyrar.

Klúbburinn opnaði nýverið lítinn golfvöll norðan við eiginlegan völl klúbbsins við Miðhúsabraut. Tilgangurinn er að koma til móts við þá sem ekki eru skráðir í golfklúbb en vilja æfa sig við ásættanlegar aðstæður.

Halldór segir notkun vallarins verða fría í ár og næsta ár hið minnsta. „Við erum að reyna að fá þetta landsvæði undir níu holu völl sem hefur þegar verið teiknaður, en þangað til það gerist verður þetta frír sex holu æfingavöllur,“ segir Halldór Rafnsson.