Karlar eiga auðveldara en konur með að neita sér um mat

Karlmenn eiga auðveldara en konur með að beita sig hörðu og neita sér um mat sem þá dauðlangar í samkvæmt nýlegri rannsókn.

„Í maga vorum býr mestur dugur, mannvit í görnum einnig," kvað Jón Hreggviðsson hástöfum er hann fór með Pontusrímur hinar eldri. Víst er það að maturinn er mannsins megin en margir kannast við að lystina þarf einnig að hemja á stundum og miðað við þann fjölda sem þessa dagana sækir líkamsræktarstöðvar landsins eru margir iðrandi eftir það sem þeir veittu sér um jólin.

Í þeirri eilífu baráttu eru karlar sagðir eiga meiri möguleika en kvenkynið. Að minnsta kosti vill Gene-Jack Wang við læknadeild Brookhaven-rannsóknarstofunnar í New York meina að svo sé. Hann tölvusneiðmyndaði heila manna og kvenna á meðan fólkið horfði og bragðaði á uppáhaldskræsingunum sínum. Næst bað hann hópinn að bæla hungur sitt niður eftir megni.

Með því að mæla notkun blóðsykurs í heilanum og virkni í svokölluðu randkerfi, sem stjórnar ýmsum tilfinningaþáttum, sást glöggt að konurnar áttu í mun meiri erfiðleikum en karlarnir með að standast hungrið. Körlum fer því að verða hált á að afsaka aukabitann svo nú er bara að drífa sig í ræktina.