Biden fundar með Sergei Ivanov

Joe Biden, varaforseti Bandaríkjanna, mun funda í dag með Sergei Ivanov, varaforsætisráðherra Rússlands. Biden hét því í gær að með nýrri ríkisstjórn í Bandaríkjunum myndi kveða við nýjan tón í utanríkismálum Bandaríkjamanna. Þau myndu meðal annars fela í sér aukin samskipti við stjórnvöld í Rússlandi.

„Ég er hér staddur í Evrópu, í umboði nýrrar stjórnar, staðráðinn í því að nú muni kveða við nýjan tón. Ekki einungis í Washington heldur í samskiptum Bandaríkjanna við ríki víðsvegar í heiminum," sagði Biden í ræðu á varnarmálaráðstefnu í Þýskalandi.

Þetta er fyrsta utanlandsreisa Biden frá því að hann og Obama tóku við lyklavöldunum í Hvíta húsinu þann 20. janúar síðastliðinn.