Flott að vera á toppnum án besta framherja heims

Jamie Carragher hjá Liverpool er mjög ánægður með fyrstu mánuði leiktíðarinnar og fagnar endurkomu Fernando Torres sem hefur náð sér af meiðslum sínum.

Liverpool hefur átt mjög gott tímabil í ensku úrvalsdeildinni og situr á toppnum eftir jólavertíðina þrátt fyrir að hafa verið mikið án stjörnuframherjans spænska.

"Það hefur gefið liðinu mikið spark að fá Torres til baka og það er gott að eiga leikmann á borð við hann til baka fyrir síðari helminginn á leiktíðinni. Hann kemur vonandi með fríska fætur inn í þetta, því stjórinn hefur mikið til haldið sig við sama mannskap í vetur. Það er frábært að liðið hafi komist á toppinn án besta framherja heims - að minnsta kosti ef horft er til síðustu tólf mánaða," sagði Carragher.