Íranar skjóta á loft gervihnetti

Íranar skutu í dag á loft sínum fyrsta heimasmíðaða gervihnetti. Þeir segja að hann verði aðeins notaður í friðsamlegum tilgangi.

Íranar hafa verið að teygja sig út í geiminn í mörg ár, í samvinnu við Rússa og Kínverja. Þeirra fyrsta gervihnetti var skotið á loft frá Rússlandi árið 2005. Þeir hafa notið aðstoðar beggja þjóða við gervihnattasmíðina.

Nú virðast þeir hinsvegar vera orðnir nógu sjálfbjarga til þess að skjóta á loft heimasmíðuðum gervihnetti á heimasmíðaðri eldflaug.

Á Vesturlöndum hafa menn áhyggjur af því að eldflaug sem getur borið gervihnött á braut um jörðu getur líka borið kjarnorkusprengjur.