Allt að 100 þúsund bændur mótmæltu í Madríd

Allt að 100 þúsund spænskir bændur komu saman í Madríd í dag til að mótmæla lágu afurðaverði og slappri ríkisstjórn. Bændurnir óku dráttarvélum sínum og öðrum landbúnaðarvélum um borgina og orsökuðu umferðaröngþveiti þegar þeir keyrðu um miðborgina.

Krafa þeirra er að landbúnaðarafurðir hækki í verði og að þeir fái einhverja vissu um að þeir geti haldið verðinu stöðugu. Það er einkum afurðaverð á mjólk sem þeir eru ósáttir við. Bændurnir segja að þeir tapi pening á hverjum einasta mjólkurlítra sem þeir framleiða. En einnig hefur ólífuframleiðslan reynst þeim erfið.