Segja Hamas myrða og pynta Palestínumenn

Palestinskur maður sakaði í dag Hamas samtökin um að hafa pyntað og myrt bróður sinn fyrir að gagnrýna samtökin opinberlega.

Osama Atalla, sem var kennari, studdi Fatah samtök Mahmouds Abbas, forseta palestínumanna. Hamas samtökin hröktu Fatah frá Gaza ströndinni með vopnavaldi árið 2007.

Sundurlyndi á Gaza

Fjöldi manna á Gaza styður Fatah og oft hefur slegið í brýnu milli þeirra og vígamanna Hamas. Svo rammt hefur kveðið að þessu að palestínumenn hafa jafnvel flúið Gaza ströndina og leitað ásjár hjá Ísraelum.

Bróðir Osama Atalla segir að grímuklæddir byssumenn Hamas hafi komið á heimili hans á þriðjudag og haft hann á brott með sér.

Fjölskyldan fékk svo upphringingu frá sjúkrahúsi og var sagt að Osama lægi þar illa haldinn. Hann lést af sárum sínum.

Hamas svaraði ekki Reuters

Ísraelska dagblaðið Haaretz segir í dag að Hamas liðar hafi tekið tugi óbreyttra borgara af lífi meðan og eftir árás Ísraela á Gaza ströndina. Sumir þeirra tilheyrðu Fatah, aðrir ekki. Fólkið var sakað um samvinnu við Ísraela.

Innanríkisráðherra Hamas svaraði ekki símhringingum Reuters fréttastofunnar sem vildu spyrja hann um örlög Osamas Atalla.

Yfirmenn öryggissveita Hamas hafa sagt að þeir hafi handtekið tugi kvislinga að undanförnu, meðal annars fólk sem þeir segja að hafi unnið með Ísraelum.