Bretar íhuga þriggja daga vinnuviku

Bresk framleiðslufyrirtæki sjá nú fram á að stytta vinnuvikuna um tvo daga vegna mikils samdráttar í efnahagslífi landsins. Breska blaðið Independent greinir frá þessu og segir mörg fyrirtæki í bílaiðnaði til dæmis stefna að þessari breytingu.

Stytting vinnuvikunnar þykir æskilegri leið en uppsagnir þar sem þetta gerir mörgum fyrirtækjum kleift að halda starfsfólkinu í stað þess að láta það fara alveg. Þriggja daga vika er ekki ný af nálinni í Bretlandi, ríkisstjórn Edwards Heath fyrirskipaði slíkt fyrirkomulag árið 1972 þegar efnahagur landsins var í krappri lægð. Þá fóru breskir námuverkamenn í sitt fyrsta verkfall í 50 ár þegar þeim var synjað um níu punda hækkun vikulauna og urðu 289 námur óstarfhæfar.

Heath lýsti yfir neyðarástandi í landinu mánuði síðar og fyrirskipaði þriggja daga vinnuviku en þá höfðu 1,2 milljónir manna misst vinnuna og var tekið að skammta rafmagn í landinu yfir daginn. Þáverandi ríkisstjórn hrundi svo með brauki og bramli í febrúar 1974.