Læknar gagnrýna áttburafæðingu

Vel heppnuð áttburafæðing í Kaliforníu á mánudagsmorguninn hefur farið sem eldur í sinu um heimsfréttirnar en þá komu í heiminn fyrstu áttburar sem allir lifðu. Hamingja og gleði umlukti móðurina og nýburahópinn en sínum augum lítur hver silfrið.

Börn sem fæðast mjög mörg saman eru oft viðkvæmari en önnur fyrir ýmsum kvillum vegna þess hve oft þau fæðast fyrir tímann. Það gerðu áttburarnir sem fyrir vikið eru smávaxnari en nýfædd börn almennt og þrír þeirra voru ekki færir um að draga andann af eigin rammleik eftir fæðinguna. Einhverjir veikleikar geta orðið langvinnir svo sem heilablæðingar og ýmis vandamál tengd innri líffærum. Þótt sjúkrahúsið harðneiti að gefa það upp segja þeir læknar sem til þekkja annað óhugsandi en að móðirin hafi tekið inn frjósemislyf eða hormóna til að fjölga kynfrumum verulega.

Slík lyfjagjöf er verulega umdeild meðal lækna og sumir þeirra telja það jafnvel brot á réttindum nýbura að láta þá kúldrast svo marga saman í legi móður sinnar. Læknir í New York sem CNN ræddi við sagði einfaldlega að hér væri á ferð vond læknisfræði.