Ný aldursgreining tunglsins

Leifar af sirkoni í grjóti sem geimfarar fluttu með sér frá tunglinu getur gefið veigamikla vísbendingu um aldur þessa fylgihnattar jarðarinnar.

Tunglleiðangurinn árið 1972 flutti með sér grjóthnullung af tunglinu þegar hann sneri aftur til jarðar. Nýjar aldursgreiningaraðferðir hafa nú gert vísindamönnum kleift að ákvarða aldur tunglsins upp á nýtt. Það eru agnir af frumefninu sirkon í grjótinu sem nýtast þessari nýju tækni ákaflega vel.

Sirkonið var greint með því að nota úran og blý til að draga aldur þess fram í dagsljósið. Jarðefnafræðingurinn Randy Korotev við Háskólann í Washington birtir niðurstöður þeirrar rannsóknar í tímaritinu Nature Geoscience og slær því þar fram að tunglið okkar sé hvorki meira né minna en 4,4 milljarða ára gamalt.

Ein kenning um tilvist tunglsins er að það hafi orðið til þegar gríðarmikill loftsteinn skall á jörðinni og þeytti grjóti og efnum úr jarðskorpunni út í himinhvolfið. Þessi efni hafi svo þéttst og smám saman orðið að fylgihnetti. Rannsókn Korotevs styður þessa kenningu og sýnir um leið að yfirborð tunglsins hafi náð fullum þéttleika um 100 milljónum ára eftir áreksturinn.