Dýrmætasta skipsflakið fundið

Bandarískt björgunarfyrirtæki telur sig hafa fundið verðmætasta skipsflak sem vitað er um á hafsbotni.

Það er breska fragtskipið Blue Baron sem árið 1942 var að flytja greiðslu til Bandaríkjanna fyrir hergögn sem Bretar höfðu fengið þaðan.

Þýskur kafbátur sökkti Blue Baron með tundurskeyti.

Breska blaðið Daily Telegraph segir að um borð hafi verið minnst 10 tonn af gulli, 70 tonn af platínum, hálft tonn af iðnaðardemöntum og 16 milljón karöt í óslípuðum demöntum.

Verðmætið á verðlagi í dag er þá um 420 milljarðar króna.

Ekki er vitað hvenær skipsflakið fannst. Ekki var einusinni vitað að það væri fundið fyrr en bandaríska fyrirtækið Sub Sea Research lagði fram kröfu í fjársjóðinn hjá bandarískum stjórnvöldum.

Ekki er heldur vitað um staðsetningu nema hvað skipið mun vera einhversstaðar undan ströndum Guyana í Suður-Ameríku.