Sullenberger fagnað sem hetju

Flugstjóranum sem nauðlenti farþegaflugvél í Hudson fljóti í New York fyrir tíu dögum var fagnað sem hetju í heimabæ sínum í gær.

Chesley Sullenberger flugstjóri lenti Airbus þrjúhundruð og tuttugu farþegarþotu US Airways flugfélagsins í Hudson fljóti í New York fimmtánda þessa mánaðar skömmu eftir flugtak frá LaGuardian flugvelli í borginni. Skömmu áður hafði flugvélinni verið flogið í fuglager og hreyflarnir þá stíflast. Sullenberger fór síðastur frá borði á eftir farþegum og öðrum í áhöfn.

Engan sakaði alvarlega.

Chesley var fagnað sem hetju þegar hann kom til heimabæjar síns Danville í Kaliforníuríki í gær. Slegið var upp veislu og hann sæmdur orðu.

,,Þetta er sögulegt og það er frábært að fá að taka þátt í einhverju jákvæðu miðað við ástandið í heiminum," sagði Deirdre Wheelan íbúi í Danville.

,,Þetta var frábært. Ég meina 150 kraftaverk áttu sér stað þennan dag," sagði Terri Lyman íbúi í Danville.

Flugstjórinn var lítillátur og sagði ekki honum einum að þakka að vel fór.