Caroline langar ekki lengur í þingsæti Hillary

Caroline Kennedy dóttir fyrrverandi Bandaríkjaforseta hefur dregið til baka umsókn sína um að taka sæti Hillary Clintons í öldungadeild þingsins.

Hillary Clinton hefur tekið við embætti utanríkisráðherra og skilið eftir sæti sitt í öldungadeild Bandaríkjanna.

Ef þingmaður stendur upp úr sæti sínu áður en kjörtímabili hans rennur út er það hlutverk ríkisstjórans í viðkomandi ríki að skipa í hans stað.

Þegar Hillary Clinton var skipuð utanríkisráðherra sótti Caroline um sæti hennar til Davids Patersons ríkisstjóra í New York. Nokkrir fleiri sóttu um sætið.

Caroline sendi svo frá sér yfirlýsingu í dag þar sem sagði að hún hefði dregið umsókn sína til baka af persónulegum ástæðum.

Ekki var gefið upp hverjar þær ástæður voru. Fréttaskýrendur benda hinsvegar á það að frændi hennar Edward Kennedy öldungadeildarþingmaður hafi fengið flogakast síðastliðinn þriðjudag.

Hann var lagður inn á sjúkrahús en útskrifaður daginn eftir.

Þau Caroline eru mjög náin. Edward Kennedy þjáist af krabbameini í heila.

Caroline dóttir Johns Kennedy forseta. Hann var myrtur í embætti árið 1963.