Enn skotið á sjúkrahús á Sri Lanka

Hundruð óbreyttra borgara á Sri Lanka flúðu í dag sjúkrahús á vígvellinum í norðurhluta landsins eftir að skotið var á það úr fallbyssum í fjórða skipti á nokkrum dögum. Að minnsta kosti þrír létu lífið og tíu særðust, að sögn Rauða krossins.

Ómögulegt er að segja til um hvort skothríðin var frá stjórnarhernum eða skæruliðum Tamíl tígra. Stjórnarherinn er nú að uppræta síðustu víghreiður Tamílanna og harðir bardagar eru á svæðinu.

Tamílar berjast fyrir sjálfstæðu ríki sínu í norður- og suðurhluta landsins. Yfir sjötíu þúsund manns hafa fallið frá því stríðið hófst á sjöunda áratug síðustu aldar.

Þrjátíu og tvær þjóðir skilgreina Tamíl tígrana sem hryðjuverkasamtök. Það voru liðsmenn þeirra sem fyrstir hófu sjálfsmorðssprengjuárásir. Meðal annars myrti ung kona með þeim hætti Rajiv Gandhi forætisráðherra Indlands.

Tamílar hafa gert fleiri sjálfsmorðssprengjuárásir en Hamas samtökin, Islamic Jihad og Al Kaida samanlagt.