Flugmennirnir alltof uppteknir

Rannsóknarnefnd flugslysa í Bandaríkjunum hefur komist að þeirri niðurstöðu að flugslys sem varð þegar tvær fréttastofuþyrlur rákust saman hafi orðið vegna þess að flugmennirnir voru alltof uppteknir.

Slysið varð í júlí á síðasta ári þegar þyrlur frá nokkrum fréttastofum, sem og lögregluþyrlur voru að fylgjast með eftirför lögreglubíla í Phoenix í Arizona.

Auk þess að fljúga þyrlunum voru flugmennirnir að hlusta á talstöðvar lögreglunnar, samræma umfjöllunina við framleiðendur á sjónvarpsstöðvunum, tala við tökumennina um borð, tala við aðra þyrluflugmenn í talstöðvum sínum og reyna að fylgjast með öðrum þyrlum í nágrenninu.

Tveir menn voru í hvorri þyrlu og fórusts þeir allir. Tökumenn í öðrum þyrlum tóku myndir af því þegar félagar þeirra hröpuðu til jarðar.