Hátíðarstemmning vestanhafs

Mikil hátíðarstemmning hefur ríkt í Bandaríkjunum síðan Barack Obama sór embættiseið sinn sem 44. forseti landsins að viðstöddu mannhafi í Washington í gær.

Líklega hefur viðlíka mannfjöldi aldrei komið saman við þinghúsið bandaríska á Capitol Hill og í gær þegar ein og hálf milljón manna fylgdist með embættistöku Obama. Forsetinn nýi þakkaði þeim sem fórnuðu svo miklu til þess að sonur manns, sem hugsanlega hefði verið synjað um afgreiðslu á veitingahúsum fyrir 60 árum, stæði nú frammi fyrir þjóðinni og sværi hinn helgasta eið.

Bandaríkjamenn fögnuðu á götum úti um gervallt landið, innblásnir nýrri von um breytingar og farsæld, og heillaóskirnar streymdu frá þjóðhöfðingjum og ríkisstjórnum annarra landa. Meðal annars lét Nicolas Sarkozy Frakklandsforseti þau orð falla að Bandaríkin sýndu nú þann ásetning að verða ný, sterk og opin.

Fyrstu klukkustundirnar í embætti höfðu Obama og Michelle, kona hans, í nógu að snúast og byrjuðu á að heimsækja tíu opinbera hátíðardansleiki sem haldnir voru í tilefni embættistökunnar. Meðal viðstaddra við embættistökuna voru leikararnir Dustin Hoffman og Denzel Washington auk leikstjórans Stevens Spielberg.

Lögregla segir að engar handtökur tengdar athöfninni hafi átt sér stað sem út af fyrir sig er sögulegt ef miðað er við manngrúann sem fagnaði nýjum forseta Bandaríkjanna